നിമിഷങ്ങളേ....

നിമിഷങ്ങളേ.... മോഹ നഭസ്സില്‍ മറയുന്ന
ശലഭങ്ങളേ.. നിങ്ങള്‍ ഇനി വരില്ലേ ...
നിശകളില്‍ വിടരുന്ന മണമുള്ള പൂക്കളേ
ഇനിയൊരു ജന്മത്തില്‍ തളിരിടില്ലേ? 

കവിളിലെ ചെമ്പനീര്‍ വാടിക്കരിഞ്ഞുവോ?
കളിമൊഴിയോതുവാന്‍ നാവും മറന്നുവോ?
കഥകളി മേളത്തിന്‍ താളമയഞ്ഞുവോ ?
കനവിന്‍റെ നിറമെല്ലാം വിളറി ക്കരിഞ്ഞുവോ?
കാലമൊരശ്വമല്ലോ ... മുന്നോട്ടു പായുമൊരശ്വമല്ലോ... 

പരിഭവം പറയുന്ന പാദങ്ങളില്‍ വഴി -
പകുതിയും പിന്നെയും ബാക്കി
പടുതിരി കത്തുന്ന മനസ്സില്‍ വ്യമോഹത്തിന്‍
പടയോട്ടമിപ്പോഴും ബാക്കി.....
മായയല്ലോ എല്ലാം മായയല്ലോ, ഇത്
മാനവ ജന്മത്തിന്‍ ബാക്കി പത്രം!